Третиот натпревар од финалната серија меѓу Бадел 1862 и Вардар ќе биде од хуманитарен карактер, најавува домаќинот. Двете екипи ќе се пресметаат во дуел кој може да го одлучи шампионот на Република Македонија за сезоната 2016/2017 година земајќи го во предвид фактот дека домаќинот на овој натпревар има водство од 2-0 (68-45 и 45-78) и само една победа го дели од четвртата во низа титула во домашното првенство. Натпреварот се игра со почеток од 20 часот во салата „Независна Македонија“.
Клубот – домаќин на овој натпревар најави дека ќе биде одигран во чест на Александра Спасова, која се бори со тумор на хипофизата.
„Заради интензивни упорни главоболки, пациентката била амбулантски упатена да направи снимање на магнетна резонанца на главата при што е констатирано постоење на голем интра/супраселарен аденом на хипофизата. Направени се ендокринолошки и офталмолошки прегледи. Неопходна е оперативна интервенција на туморот на хипофизата во поскор датум со оглед на тоа дека може да настанат нагли промени на заболувањето што би го довело пред сè во ризик видот и општата здравствена состојба на пациентката“ – стои во извештајот на специјалистот.
За операцијата на Александра која треба да се изведе во Германија, потребни се 19.000 евра – средства кои таа самата не може да ги собере. Со оглед на тоа дека влезот на натпреварот е бесплатен, Бадел 1862 ќе постави кутија за собирање донации за операцијата.
Покрај тоа, сите хумани граѓани кои имаат волја и желба да помогнат можат да уплатат на следната сметка. Броеви за донација сè уште не се обезбедени.
Комерцијална банкаIBAN: MK07300307063969828
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
