Борко Ристовски анализира: Нема добри и нема лоши, сите сме Македонија…Одигравме ЕП на високо ниво!

ЕКИПА на ЕП во Хрватска, 

Стеван Цаневски, Билјана Б. Петрушева, Игор Паневски

Македонија го закружи настапот на Европското првенство во Хрватска со денешниот убедлив пораз од Данска (20-31), но во глобала ги исполни очекувањата и плановите со кои тргна кон Загреб. Успеа да се пласира во втората фаза од шампионатот, оствари две победи и едно реми во првата фаза, а потоа следеа три порази во Вараждин.

Борко Ристовски е секогаш реален во своите коментари, и веднаш по завршувањето на ЕП анализира…

„Ако ги тргнеме на страна двата убедливи порази, од Шпанија, и од Данска, мислам дека одигравме еден шампионат на високо ниво. Посакувавме пласман во втората фаза пред почетокот, и тоа го исполнивме. Се разбира, секогаш има грешки, имаме и нереални очекувања, кои посебно се зголемија по нашите одлични игри на првите три натпревари во Загреб. Оваа репрезентација е веќе 15 години на сцена и мислам дека ние никогаш, па дури ниту во Србија, не сме биле поблиску до едно европско полуфинале. Верувајте дека на секој меч, освен со Шпанија и со Данска, се чувствувавме моќни, имавме сила да играме против секоја репрезентација, а видовте и дека сите ракометари добија шанса да играат на ова Европско првенство. Тоа е она позитивното што може да се извлече. Треба секогаш да се гледа позитивно, а не да гледаме кој колку згрешил“, вели Ристовски.

Голманот истакнува дека сепак деталната анализа треба да следи од селекторот Раул Гонзалес.

„Селекторот Раул Гонзалес и неговиот стручен штаб, веројатно откако се ова ќе се смири, ќе направат детална анализа. Треба да се види зошто на клучните натпревари ни недостигаше и малку сила, ни недостигаше и малку среќа, ни недостигаше и малку ротација….Тоа е тоа, нема многу филозофија. Мислам дека сите треба да се сложиме дека на сите натпревари одигравме борбено, на некои од нив дадовме и повеќе од 100%. Жално е на крајот што не остваривме подобар резултат, доколку го добиевме вчера натпреварот со Чешка се ќе беше поинаку и Македонија ќе завршеше една многу поинаква и поуспешна ракометна приказна овде во Хрватска. Но, да не заборавиме, ние сме Балканци, и треба да поработиме малку повеќе на нашата психологија. Но, тоа не е само од нас, тоа ни се влече низ историјата, и ќе ни требаат уште многу години за да го надминеме балканскиот менталитет. Радува што оваа репрезентација како никогаш досега има сплотеност, заедништво, сите „гинат“ и од смиот почеток ние не гледавме кој е најдобар и кој е најлош, сите сме Македонија. Така треба да гледаат и сите други, ние играме за државата. Сите ние си имаме свои договори во клубовите и таму се докажуваме, но овде сме сите заедно и ја претставуваме Македонија“, изјави Борко Ристовски.

 

 

 

 

 

Се вчитува...