Чеховски медведи „го изедоа“ Металург среде Скопје - Екипа
Сакај СПОРТ!   Читај Спорт!   Живеј СПОРТ!
Ekipa
Ракомет
17/11/2017 20:24
Фудбал
17/11/2017 15:37
Ракомет
17/11/2017 12:37
Кошарка
17/11/2017 9:55

Чеховски медведи „го изедоа“ Металург среде Скопје

Чеховски медведи „го изедоа“ Металург среде Скопје

Металург не ја оправда фаворитската улога во возвратниот дуел со Чеховски медведи и беше поразен на домашен терен со 26-29 во натпреварот од 6.коло во групата Д од Лигата на шампионите. Рускиот тим успеа да им се реваншира на „металурзи“ за поразот во претходното коло и на гостувањето во Скопје стигна до првите бодови сезонава во ЛШ, по пет порази во серија. Металург одигра под нивото што им донесе позитивни резултати во претходните три натпревари од ЛШ, имаше многу грешки во одбраната, тешка реализација и безидејност во нападот, четири нереализирани седмерци и многу примени голови на празен гол и на крај казната беше непланиран пораз на домашен терен,вкупно трет во натпреварите од групната фаза во ЛШ.

Седум минути му беа потребни на Металург за да дојде до првиот погодок по серијата грешки и промашувања во нападот. Ни играта со седум играчи во напад, не донесе поголема ефикасност кај „металурзи“, но затоа пак им отвори простор на гостите да дојдат до три лесни погодоци на празен гол од кои еден и на голманот Дмитри Павленко. По првите десет минути Чеховски медведи веќе имаа водство од 1-5, а Металург се уште се обидуваа да фатат ритам и да ја најдат вистинската игра. Капитенот Филип Кузмановски успеа да намали од седмерец на 2-5, но потоа во вториот обид од линијата на седум метри неговиот удар беше сопрен од Павленко, што дополнително ја отежна ситуацијата на Металург во првата четвртина од натпреварот. Во 12.минута гостите прв пат зголемија на +5 поведувајќи со 2-7.


kuzmanovski metalurg medvedi

„Металурзи“ успеаја да врзат да гола во серија и да ја намалат негативата, но не и бројиот на техничките грешки, посебно во нападот, што Русите овој пат знаеја ефикасно да ги казнат и на десет минути пред крај на првиот дел, да ја зголемат предност на 6-12, а потоа и со 7-13.

Александар Јовиќ се обиде да го смени ритамот, поставувајќи го Мартин Томовски на голот на местото на индиспонираниот Дарко Арсиќ кој за дваесет минути имаше само една одбрана. Смената на голманската позиција и подлабоката зона на Металург донесоа резултат. Томовски одбрани два напади на Чеховски медведи,  а„металурзи“ со три гола во серија намалија на 10-13. Но, Чеховски медведи не го испуштаа водството, а на фрака им одеше и исклучувањето на Мартин Велковски, за одново да се вратат на +6 (11-17) во последната минута од првото полувреме, а на одмор заминаа со предност од 12-17.

tomovski brani metalurg medvedi

Почетокот на второто полувреме не донесе ништо ново во однос на резултатот. Металург отвори со погодок на Божо Анѓелиќ, а во следниот напад ефикасен беше Кузмановски. Но, комплетно играта на Металург и понатаму беше под посакуваното ниво. Безидејноста во нападот и несигурната игра во одбраната, им оставија простор на гостинските ракометари брзо да се вратат на безбедни +6 (14-20). За среќа на Металург, Мартин Томовски имаше неколку и тоа како важни одбрани од кои и еден одбранет седмерец  што колку-толку ги држеше „металурзи“ во игра. Сепак, за пресврт требаше многу поголема поддршка и од останатите играчи на терен, а на Металург на овој меч тоа му недостасуваше. Русите ја казнуваа секоја грешка, постигнаа уште неколку лесни погодоци на празниот гол на Металург и во 46.минута стигнаа до нависоко водство од 18-23.

aleksandar jovic metalurg medvedi

Во последната четвртина од натпреварот, Металург конечно заигра многу поагресивно, успеа да намали на 23-26 на осум минути пред крај и имаше напад за -2, но Павленко одновио беше сигурен на гостинскиот гол и усепа да ја одбрани предноста на Чеховски медведи. Двата гола во серија на гостинските ракометари што следуваа потоа, практично го решија победникот.

Божо Анѓелиќ постигна пет гола, по четири погодоци за Металург реализираа Жарко Пешевски, Давор Палевски и Александар Гуглета. Мартин Томовски заврши со осум одбрани. Кај Чеховски медведи најефикасни беа Дмитри Санталов со седум и Павел Андреев со шест гола, а Дмитри Павленко запиша 15 одбрани.

Во следното коло од групата Д во Лигата на шампионите, Металург на 12 ноември го пречекува Монпелје кој е прв на табелата со максимални 12 бода.

Advertisement

Редакцијата на Екипа се оградува од сите коментари со навредлива и заканувачка содржина што ќе ги пласираат читателите. Воедно, бара од сите свои читатели да се воздржат од навреди по национална и верска основа. Таквите коментари ќе бидат повлечени.