Филип Талески конечно го имаше своето деби во дресот на Некар Левен, откако македонскиот репрезентативец настапи за „лавовите“ на вечерашниот меч со Минден што германскиот првак го доби со 26-20. Екс-капитенот на Металург пристигна во новиот клуб по завршувањето на СП во Франција, во изминатиот месец тренираше со остатокот од тимот, за денеска да добие шанса и на теренот да покаже дел од своите квалитети.
Тој влезе во игра уште во првото полувреме и со прецизен удар успеа да го матира гостинскиот голман во периодот кога „лавовите“ се мачеа во фазата на нападот. На одмор неочекувано се замина со предност на Минден од 9-11, за потоа Некар Левен во вторите 30 минути да заигра во својот препознатлив ритам, лесно да го сврти резултатот во своја полза и да триумфира со конечни шест гола разлика.
Талески го заврши мечот со еден гол од четири шутеви, но јасно е дека како што ќе минува времето, така неговата самодоверба ќе расте, а со тоа и ефектот на натпреварите на германскиот гигант.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
