Кавани во ПСЖ до 2020 година

Единсон Кавани нема во блиска иднина да ги менува клупските бои откако уругвајскиот голгетер ги договори условите за продолжување на соработката со Пари сен Жермен. Откако неколку сезони во целосна сенка на Златан Ибрахимовиќ, Уругваецот сезонава блесна и се наметна како лидер на „светците“, постигнувајќи 30 гола во досегашниот тек од францускиот шампионат.

Тоа беше доволна препорака за Манчестер јунајтед и Манчестер сити да искажат интерес за да го доведат во своите редови, а челниците на ПСЖ да реагираат и експресно да договорат продолжување на соработката. Францускиот весник „Л’Екип“ обелодени дека новиот договор ќе биде со важност до 2020 година, а истиот ќе биде официјално потпишан во текот на утрешниот ден.

„Светците“ не планираат тука да застанат, туку сакаат дополнително да го засилат нападот на екипата за новата натпреварувачка сезона. Во тек се преговорите со Алексис Санчез, за чии услугите на Арсенал му се понудени 40 милиони евра.

Се вчитува...