Шкендија го совлада актуелниот првак Вардар со 2-0 во првото големо дерби што се одигра денеска во Тетово, на самиот старт од новата сезона во Првата лига. Вицепрвакот сосема заслужено стигна до трите бода и ја ’раздрма’ круната на „вардарци“ уште во самата најава за новата шампионска трка. Алими и Жуниор во второто полувреме беа стрелци на головите за Шкендија, а Гачевски и Грнчаров спасија најмалку уште двапати да се тресе мрежата на Вардар.
Во Ѓорче Петров, Работнички и Ренова ремизираа без голови, и речиси и да немаше вистински шанси на овој натпревар.
Актуелниот шампион Вардар дојде на мегдан во Тетово по најавите на спонзорот Сергеј Самсоненко за повлекување, а и двата тима се во очекување на плејоф колото од Лигата на Европа. Шкендија ќе игра против Милан, а Вардар против Фенербахче. Тренерот Гоце Седлоски во првиот состав му даде шанса на младиот 17-годишен напаѓач Бојан Колевски, јасно ставајќи до знаење дека треба да се купи нов голгетер по продажбата на Балотели.
Ибраими и Хасани уште од почетокот најавија дека Шкендија е решена да оди на победа во големото дерби, а вардарци се бранеа. Во 17.минута, Марјан Радески зфати волеј – удар, а Гачевски го спаси својот гол со добра интервенција. Потоа возврати и Блажевски со силен шут, но Захов итервенираше одлично. Хасани се обиде од слободен удар, но не беше прецизен.
Вардар издржа едно полувреме, но нападите на Шкендија уште повеќе се засилија во вториот дел. Шанси имаа Алими и Ибраими, а потоа дојде и водството на домаќинот.
Арменд Алими во 61.минута, упати вистинска „бомба“ од 25 метри и ја затресе мрежата на Гачевски. Само пет минути подоцна, Стенио Жуниор зголеми на 2-0. Хасани асистираше до Бразилецот кој уште еднаш погоди на вистинското место.
Во Ѓорче Петров, Работнички и Ренова одиграа здодевен меч. Без вистински шанси, многу повеќе внимаваа да не се затресе нивната мрежа. Стефан Костов уште на самиот старт се закани со удар со глава, потоа Велинов и Кире Маркоски возвратија, но без ефект на спротивната страна. Сличен обид имаше и Александар Темелков.
Во 75.минута, Стојанчо Велинов нафрли од слободен удар, Кобетиќ ја одби топката, а сепак одбраната на Ренова беше поенергична од напаѓачите на „романтичарите“.
ПРВА ЛИГА, 1.КОЛОШКЕНДИЈА – ВАРДАР 2-0РАБОТНИЧКИ – РЕНОВА 0-0УТРЕ, 17 ЧАСОТСИЛЕКС – СКОПЈЕПОБЕДА – ПЕЛИСТЕРШКУПИ – АКАДЕМИЈА ПАНДЕВ
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
