На второлигашот ФК Тетекс му прекипе. Во пресрет на новата второлигашка сезона, клубот испрати допис до Фудбалската Федерација на Македонија (ФФМ) односно до Општина Тетово, во кое се вели дека доколку не му биде дозволено следната натпреварувачка сезона да ги игра домашните натпревари на Градскиот стадион во Тетово, ќе се откаже од натпреварувањето. Со оглед на фактот што минатата година Тетекс ги играше своите натпревари како домаќин на игралиштето на Агенцијата за спорт и млади во Тетово, очигледно дека му здодеа да биде “бездомник” во сопствениот град, па реши да пресече.
Раководството на клубот испрати ултиматум, дека или ќе игра на Градскиот стадион во Тетово, како што го прават тоа Шкендија и Ренова, или пак воопшто нема да се натпреварува. Со ова клубот ја префрла топката кај надлежните институции, кои секако пред стартот на оваа сезона, бараат од него да пријави терен кој ќе го носи како домашен.
Од Тетекс напоменуваат дека не постојат законски пречки клубот да не игра на Градскиот стадион. Односно до 31.12.2016 година било важечко правилото на еден стадион да може да се игра само еден натпревар неделно, а сега тоа правило повеќе не постои. Тоа значи дека и Шкендија и Ренова, како прволигаши, но и Тетекс, како второлигаш, имаат право да настапуваат на стадионот, секако со финансиски надоместок.
Според последните информации еден натпревар на стадионот во Тетово ќе го чини Тетекс 30.700 денари.
Финансиите се обезбедени, се тргнува со подготовките. Од друга страна, пак паралелно со ова прашање, Тетекс решава и други тековни проблеми. Околу финансиите за следната сезона, обезбедени се дел од нив и екипата ќе почне со подготовките.
Енис Дервиши замина во редовите на Работнички, исто така од клубот замина Беким Реџепи во Шкендија и тоа се единствените двајца што ќе ги нема на прозивката.
Од друга страна пак, како прво засилување е најавен Мирослав Јовановски од Брегалница. Почетокот на летните подготовки се закажани за 12. јули.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
