Тренерот на актуелниот јадрански шампион Црвена звезда, Душан Алимпијевиќ, е на големи маки, со оглед дека на вечерашното гостување против Панатинаикос во Евролигата ќе биде без Перо Антиќ и Немања Дангубиќ.
По тешките пресметки против Валенсија во Евролигата и Морнар во полуфиналето од АБА – лигата, поради замор овие двајца кошаркари се ослободени од обврски.
„Минатата недела одигравме два добри меча против Валенсија и Морнар, одиме растоварени во Атина да одиграме добар натпревар. Панатинаикос е одлична екипа која се бори за топ 8 во Европа, но ние иако со ослабен ростер сакаме да дадеме отпор и да покажеме желба за позитивен резултат. Нема да сметаме на Дангубиќ и на Антиќ за оваа пресметка“, истакна Алимпијевиќ.
„Црвено-белите“ ќе бараат „невозможна“ одмазда за поразот во Белград (63-69). Натпреварот од 27. коло во елитното европско натпреварување ќе се одигра вечерва од 20.15 часот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
