Неполни 24 часа откако Енди Мареј објави дека нема да биде дел од Австралија опен, утрово истото го стори и најдобрата светска тенисерка, Серена Вилијамс. Американката извесно време е надвор од терените од семејни причини, во септември го роди своето прво дете, а откако пред неколку дена настапи во Абу Даби денеска обелодени дека сепак нема да учествува на првиот гранслем турнир за 2018 година.
„Многу сум близу до топ-форма, но на турнирот во Абу Даби увидов некои работи што ќе треба да ги корегирам. Можам да учествувам и да играм добро, но секогаш велев дека ќе играм само на оние турнири на кои можам да победам. Сега тоа не е случај и затоа ќе продолжам со напорни тренинзи“ – изјави Вилијамс.
Американката е актуелна шампионка на Австралија опен од минатата година и неиграњето ќе значи одземање на 2.000 бода од ВТА-листата, на која Серена моментно се наоѓа на 22. позиција.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
