Кошаркарите на МЗТ Скопје го завршија првиот круг од натпреварувањето во АБА-лигата со очаен скор 2-9, заковани на дното на табелата. Македонскиот првак вечерва (19 часот) се среќава со еден од двата тима што успеа да ги совлада, белградски Партизан, чии кошаркари се решени да сторат се за да се одмаздат за поразот во првото коло од 92-89.
Во однос на тој дуел и двете екипи ќе имаат различни тренери, Чанак ќе дебитира во АБА-лигата, на местото на Мута Николиќ, додеа Лукајиќ пред една седмица го наследи Александар Тодоров во МЗТ Скопје. „Металците“ беа на чекор до прекин на губитничката серија на дуелот со Морнар, но откако „прокоцкаа“ предност од 19 поени кризата е уште подлабока, сосема разбирливо ако се знае дека последниот триумф го забележаа пред точно два месеци, на 16 октомври, на гостувањето против Игокеа.
„Немавме среќа да победиме против Морнар, но покажавме голема желба и позитивна енергија. Ако ги повториме тие работи во Белград, сигурно ќе дојдеме до ситуација да го изненадиме противникот. Партизан е тим што секогаш мора да се респектира, но кој исто така има и слаби точки кои ќе се обидеме да ги искористиме. Добро трениравме во последните денови и ако се држиме до планот, верувам дека ќе одиграме добар натпревар“ – изјави Дарко Соколов.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
