Арсенал наводно го договори првото зимско засилување, играчот од средниот ред на Севилја Стивен Нзонзи. Според шпанските медиуми, францускиот репрезентативец ќе се врати во Премиер – лигата за сума од 37 милиони евра, а ќе бидат додадени плус три милиони евра како бонус за да се достигне до неговата клаузула (40 милиони евра).
Нзонзи во неколку наврати изрази желба да го напушти клубот од Андалузија, а меѓусебната врска згасна минатиот месец кога фудбалерот беше заменет против Ливерпул во Лигата на шампиони. Иако ниту еден клуб засега не го потврдува трансферот, враќањето на Нзонзи во Англија е само прашање на време. Покрај неговата желба да се врати на „островот“ има интерес од неколку клубови, меѓу кои е и Евертон со Сем Алардајс на чело, менаџерот кој му ги отвори вратите на Нзонзи во Премиер – лигата во времето кога го водеше Блекбурн.
„Мојата иднина е далеку од овој клуб. Морам само да го дочекам крајот на декември и потоа си заминувам од тука. Им посакувам се најдобро на Севилја во Лигата на шампиони и шпанското првенство, но јас нема да бидам дел од таа авантура. Жал ми е што вака ќе заврши, но клубот дозволи да се дојде до оваа позиција“, истакна Нзонзи.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
