Борко Ристовски беше најзаслужен за неочекувано тешката победа на Барселона на домашен терен против Кристијанштад со 31-29 во натпреварот од 2.коло во Групата А од Лигата на шампионите. Македонскиот голман забележа 14 одбрани, но одигра и клучна улога во финишот на мечот во кој Барса ја обезбеди победата.
По ремито во првото коло на гостувањето против Рајн Некар Левен, македонскиот голман одново беше клучна фигура во составот на Барса во решавачките моменти. Ристовски беше сигурен на голот во завршницата на мечот кога домаќините беа во негатива со 27-29 и три одбрани во серија, и овозможи на Барса да тргне во контранапад и со серија од 4-0 да ја осигура победата.
По супериорниот старт и водството на барселона од 5-0, каталонскиот тим дозволи да го потцени противникот и да го врати во игра. Кристијанштад успеа да направи пресврт во вториот дел и во финишот да влезе со два гола предност. Но, искуството на Барселона и сигурната партија на Борко Ристовски сепак беа пресудни во финишот.
Валеро Ривера беше прв стрелец во каталонскиот тим со осум гола, Камил Сипжак постигна пет од пет, а капитенот Виктор Томас четири од четири во триумфот на Барселона. Тим Соренсен со шест погодоци беше најефикасен во составот на Кристијанштад.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
