Селекторот на младата репрезентација на Македонија, Благоја Милевски вели дека ја почитува одлуката на фудбалерот на Јанг Бојс, Таулант Сефери во иднина место за македонската селекција да настапува за Албанија.
Сефери се најде на списокот на Милевски за престојниот тест дуел со Црна Гора, но само заради тоа што македонскиот стручен штаб претходно немаше информација дека Сефери веќе ја одбрал Албанија. Милевски единствено жали што членот на Јанг Бојс не одговори на неговите повици изминативе десет дена и лично да му ја соопшти одлуката…
„Ја почитувам одлуката на Таулант Сефери да настапува за албанската репрезентација. Можеби очекував да одговори на моите телефонски повици изминативе десеттина дена и лично да ми ја соопшти одлуката, посебно по нашиот разговор на 15. февруари кога самиот ми потврди дека има желба и е подготвен да игра за нашата репрезентација. Но, веќе и не е толку важно, во текот на вчерашниот ден по објавувањето на списокот добив порака од Таулант во врска со неговата репрезентативна иднина и ни преостанува да ја почитуваме одлуката да игра за Албанија. Му посакувам пред се добро здравје и успех во иднина“ – вели Милевски во изјава за официјалната страница на ФФМ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
