Јувентус скапо ја плати последната победа над Сасуоло откако беше обелоденето дека Блес Матуиди ќе паузира најмалку еден месец од фудбалските терени. Францускиот интернационалец мораше да биде заменет, а лекарските прегледи покажаа дека станува збор за кинење на мускул и пауза од најмалку триесет дена.
Ова значи дека екс-фудбалерот на ПСЖ ќе пропушти важни натпревари од домашното првенство, но и најмалку еден дуел од двомечот во осминафиналето од Лигата на шампионите против Тотенхем. Тренерот Алегри се надева дека Матуиди би можел да се врати за реваншот на „Вембли“, закажан за 7 март. Во негово отсуство за очекување е шанса да добие Клаудио Маркизио, кој сезонава поголем дел од натпреварите ги почнуваше од клупата за резерви.
Првиот натпревар против Тотенхем ќе го пропуштат и Квадрадо и Дибала, а добра вест за Јуве е враќањето на Даглас Коста, кој поради повреда не настапи против Сасуоло.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
