Поразот од вечниот ривал Работнички ги натера челниците на МЗТ Скопје на нови промени во играчкиот кадар пред самата завршница на сезоната. Стефан Синовец е нов кошаркар на актуелниот првак, откако српскиот интернационалец денеска потпиша договор со „металците“, што ќе биде негова четврта авантура во редовите на аеродромци.
Неговиот договор е до крајот на сезоната, а Синовец доаѓа од таборот на Мега Бекамс, каде што во АБА-лигата имаше просек од 9,4 поени, 4,5 скока и 3,1 асистенции. Синовец се очекува да пристигне во Скопје утре рано наутро за да ги заврши сите формалности околу договорот и да може да дебитира на задутрешната пресметка со Кожув во салата „Јане Сандански“.
Од СЦ „Јане Сандански“ си заминува неговиот сонародник Ѓорѓе Мајсторовиќ и тоа со спогодбен раскин на договорот. Тој дојде на почетокот на ноември и одигра 14 средби во регионалното натпреварување со просек од 4,8 поени и 2,7 скока. Српскиот центар пристигна како огромно засилување, но не ги оправда очекувањата на македонскиот првак и сега предвреме си заминува од МЗТ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
