Македонија има предност од осум гола по првиот бараж дуел со Романија, пласманот на СП 2019 е речиси осигуран, но Кире Лазаров не би бил вистински лидер на нашиот национален тим доколку секогаш не настојува да се игра уште подобро, да се извлече максимумот од секој ракометар за што поголем успех на колективот.
„Ако говориме за резултатот, мора да сме задоволни и среќни бидејќи ќе прифатевме со две раце ако некој пред натпреварот ни понудеше ваков исход. Од друга страна, знаеме дека можевме уште повеќе, направивме многу грешки, ако планираме уште поголем успех во иднина, треба да се поправиме. Како капитен искрено очекувам помладите ракометари да имаат поголем придонес во тимот“ – изјави Лазаров.
Предноста пред реваншот в среда во Клуж е огромна, но македонскиот капитен е свесен дека не смее да дојде до опуштање.
„Имаме солидни плус осум, не примивме многу голови, јасно ни е дека сме близу. Сепак, мора да се внимава бидејќи знаеме каков може да биде ракометот, како секое опуштање се казнува. Затоа, наша желба не треба да биде да ја одбраниме оваа предност, туку да играме и во Клуж за да победиме“ – порачува Кире Лазаров.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
