Македонскиот првак Шкендија вечерва (19 часот) му гостува на австрискиот шампион Салцбург во првиот меч од третото квалификациско коло од Лигата на шампионите. Тимот на Ќатип Османи е аутсајдер, со оглед на реномето на познатиот австриски тим, кој минатата сезона стигна до полуфиналето во Лигата на Европа, но тоа не значи и дека лесно ќе се предаде на ова значајно гостување. Желбата е да се оствари позитивен резултат пред реваншот во Скопје за шест дена, затоа што следниот чекор значи и историски резултат, пласман во плејоф колото, пред групите во елитното европско клупско натпреварување.
Тренерот Ќатип Османи му ја препушта фаворитската улога на Салцбург, но и верува во квалитетите на своите фудбалери.
„Салцбург го заслужува нашиот респект. Тоа е квалитетен тим, клуб со огромен буџет, кој долги години игра значајна улога во фудбалска Европа. Но, и Шкендија сака да напредува, го прави тоа на свој начин во изминатите неколку сезони и сега сакаме да направиме уште еден значаен исчекор. Веруваме во нашите можности и ќе дадеме се за да му се спротивставиме на Салцбург. Ќе ја играме нашата игра и се надеваме дека можеме да се вратиме дома со позитивен резултат“, вели тренерот Ќатип Османи.
Мечот меѓу Салцбург и Шкендија ќе се игра во 19 часот, а ќе го суди Алијар Агајев од Азербејџан.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
