Вардар ги продолжува подготовките за новата сезона, а тренерот Роберто Парондо имаше можност да ги види на дело своите ракометари на турнирот во Германија. „Вардарци“ го освоија четвртото место забележувајќи една победа и два порази, но за шпанскиот стратег најважен е пристапот на самите играчи, кој е на посакуваното ниво.
„ Во Словенија работевме добро, играчите работеа на физичката подготовки и работеа вредно. Сега е време кога повеќе внимаваме на физичката подготвеност. Имавме некои проблеми со настинка на некои ракометари па не секогаш бевме комплетни, но генерално добро ги завршивме подготовките. Турнирот беше генерално гледано беше добар. На првиот меч имавме 23 промашени удари, тоа ни беше проблем. Но, беше прв натпревар и патувавме цел ден. Потоа игравме одличен меч 60 минути, а тоа е тешко во оваа фаза на подготовки. Сепак покажавме дека можеме да играме на високо ниво. На последниот меч со Лајпциг не игравме лошо, иако можевме и подобро. Ни требаат уште некои детали во играта. Судиите беа навистина лоши, но ние не треба да ја губиме концентрацијата. Наместо на играта да не мислиме на судиите“ – вели Роберто Гарсија Парондо.
Најтежок дел од задачата ќе биде да се склопи одбраната, која беше заштитен знак на „вардарци“ во претходните години.
„Ние сме нов тим во одбрана, и тоа им го кажувам и на играчите. Во напад сме можеби исти, но во одбрана сме нови, пробуваме нови играчи, и ќе треба време за сѐ да биде како што сакаме“ – истакнува стратегот на „црвено-црните“.
Следниот натпревар за Вардар доаѓа веќе викендов, на средбата од Супер Купот на Македонија против Металург, дуел што ќе се игра на отвореното игралите во Струга.
„ Сега веќе доаѓаат натпревари на кои ни е потребен резултат. Особено оние што ги играме дома. Се подготвуваме и верувам дека ќе играме на нивото што го сакаме, бидејќи се уште сме во фаза на подобрување на формата за да бидеме спремни за она што не очекува од следниот месец“ – порачува новиот Шпанец на клупата на македонскиот шампион.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
