Македонската репрезентација до 17 години в сабота на тренинг центарот „Петар Милошевски“ ги започнува натпреварите од претквалификацискиот турнир за влез во елитната фаза од квалификациите на УЕФА за пласман на ЕП.
Македонија е во група со Шпанија, Израел и Фарски острови. Првиот дуел го играме против Шпанија на 20. октомври (сабота) од 14:30 часот, во истиот термин на 23. и 26. октомври ќе се соочиме со селекциите на Израел и Фарски острови.
„Нашата цел е добар резултат на турнирот и борба за влез во елитните квалификации за пласман на Европско првенство. Подготвени сме, иако се соочивме со одредени проблеми во однос на составот. Костовски е повреден,a поради административни пречки Јорданов нема да биде во конкуренција за голманската позиција. Сметам дека во овој тим голема поддршка и квалитет ќе донесеше Никола Секулов доколку беше во репрезентацијата, но иако добиваше покана за настап на секој контролен натпревар до овој турнир, Секулов не ја прифаќаше, односно не сакаше да игра за Македонија, а на крајот дури бевме условени од неговиот родител со повик и за неговиот брат во генерацијата 2000., за Никола Секулов да се стави на располагање на нашата репрезентација. Како и да е, ние сме сконцентрирани на натпреварите кои ни следуваат, ќе биде многу тешко со првиот фаворит Шпанија, но шансата ќе ја бараме со репрезентациите на Израел и Фарски острови“ – вели селекторот Марио Вујовиќ.
Селекторот на Македонија до 17 години, Марио Вујовиќ за турнирот на кој ќе бидеме домаќини ќе смета на следните 20 фудбалери:
Голмани: Марко Алчевски (Академија Пандев), Филип Ваневски (Њу Старс);
Одбрана: Спасе Терзиев (Академија Пандев), Анатолиј Петајчук (Вардар), Али Асани (Вардар), Бесфорт Арифи (Мастрих, Холандија), Александар Ѓурковски (Вардар), Иван Николов (Академија Пандев), Горазд Стојменов (Њу Старс), Нешад Мурати (Шкендија);
Среден ред: Димитар Тодоровски (Работнички), Марио Илиевски (Септември, Бугарија), Филип Андоновски (Вардар), Лука Станковски (Работнички), Владан Новевски (Војводина, Србија);
Напад: Бехар Фетаи (Њу Старс), Сава Аврамовски (ОФК Београд, Србија), Марио Костески (Работнички), Методи Максимов (Работнички), Азер Омерагиќ (Вардар).
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
