Кошаркарите на Голден стејт синоќа славеа против Бруклин на свој паркет со 116-100 во еден од дуелите од НБА лигата.
Вориорси вторпат сезонава славеа против Бруклин, овој пат далеку полесно предводени од Кевин Дурант кој запиша „дабл-дабл“ од 28 поени и 11 асистенции, а забележа уште пет скока, две украдени топки и една блокада.
Во домашниот тим синоќа не беше повредениот Стеф Кари, но уште се истакнаа и Кук со 27 поени како и Томпсон со 24 постигнати поени. Кај гостите најефикасен беше Харис со 24 поени.
Одличен меч одиграа ЛА Лејкерси и Сакраменто. Лејкерси стигнаа до шестата победа сезонава предводени од Леброн Џејмс. „Езерџиите“ победија со 101-86 а Џејмс постигна 25 поени, дополнети со седум скока и две асистенции.
Уште една фантастична партија демонстрираше Лука Дончиќ во победата на Далас против Оклахома од 111-96. Дончиќ запиша 22 поени, 8 асистенции и шест скока, најефикасен во својата екипа.
Во останатите мечеви Њу Орлеанс го победи Феникс со 119-99, Чикаго во неизвесен меч беше подобар од Кливленд со 99-98, а Мемфис по продолжение славеше против Филаделфија со 112-106. Вашингтон славеше на гостувањето против Мајами со 110-116, а Сан Антонио пред своите навивачи беше подобар од Хјустон победувајќи со 96-89.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
