Сташ Скубе пристигна во Вардар од редовите на Пик Сегед во текот на летото, по што словенечкиот среден бек експресно се промовираше во вистински „командант“ во нападот на „црвено-црните“. Предизвикот воопшто не беше мал, да се наследи Лука Циндриќ како организатор на играта на „вардарци“, но Скубе одговори на најдобар можен начин. Во разговор за официјалната веб-страница на Вардар, словенечкиот интернационалец не го крие задоволството од експресната адаптација во новата средина, како и одличните резултати на Вардар во првиот дел од сезоната.
„Мислам дека сите треба да сме многу задоволни од резултатите, и играчите и стручниот штаб, а и публиката, која е незаменлива потпора и мотивација за екипата и на најтешките натпревари. После десеттото коло од Лигата на шампионите имаме 13 бодови и имаме добри услови да се одржиме на втората позиција на табелата во нашата група. И во СЕХА лигата сме на врвот од табелата, така што целта е исполнета. Трансферот во Вардар што се покажа како полн погодок за продолжување на мојата професионална кариера“ – истакнува Скубе.
Скромниот Словенец има една желба за 2019 година – и тоа многу голема.
„Во новата година си посакувам здравје и успешен Вардар. Да играм на Ф4 во Лигата на шампионите со Вардар, тоа е она што ми е голем сон за 2019“ – открива Сташ Скубе.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
