ЕКИПА во Минхен,
Стеван Цаневски
Легендарниот голман Владо Шола освои се што можеше да се освои со хрватската репрезентација под водство на Лино Червар, а деновиве е во Минхен во улога на стручен аналитичар. Во разговор за ЕКИПА тој ги искажа своите импресии за дуелот меѓу Македонија и Хрватска.
„Беше ова многу убав натпревар за следење, пред се поради тактичкото надмудрување меѓу двајцата селектори. Видовме убави акции на двете страни, напади „седум на шест“ во кои и Македонија создаваше чисти шутеви, но Шего беше одличен денеска и донесе предност уште во раната фаза од натпреварот. На крајот Хрватска заслужено славеше, но и Македонија се покажа во добро светло“ – истакна Шола.
Тој имаше можност да го види на дело и составот на Исланд, па во пресрет на нашиот меч од последното коло, во директна битка за втората рунда, Шола очекува максимално неизвесна битка.
„И Исланд има добра репрезентација, исто како и Македонија. На тој натпревар ќе нема фаворити, шансите се 50-50. Мислам дека со ваква игра како денеска можете да ги добиете Исланѓаните, доколку подобро ги реализирате чистите ситуации“ – прогнозира Владо Шола.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
