Со мечот меѓу Парма и Јувентус денеска од 18 часот, викендов стартува новата сезона од Серија А. Дали торинската „Стара дама“ ќе успее да дојде до својот девето едноподруго, а вкупно 36-то Скудето? Кој може да ги расипе сметките на Јуве?
Одговорот на сето тоа треба да се добие во текот на сезоната која е пред нас, но, во секој случај, едно е сигурно – италијанското првенство од поодамна не било вака квалитетно и израмнето.
Јувентус, екипата која речиси деценија доминира во италијанскиот фудбал, сезоната ја очекува со нов тренер. Но, „црно-белите“ тешко го менуваат системот. Некогаш Антонио Конте, па Макс Алегри, денеска Маурицио Сари кој е доведен за да Јуве успее да направи и чекор напред во Лигата на шампионите, натпреварување кое не успеале да го освојат од 1996 година.
По епизодата во ПСЖ, во клубот се врати и легендарниот Џанлуиџи Буфон, од Ајакс е доведен најдобриот млад стопер во светот, Матија Де Лихт, а како слободни играчи пристигнаа Арон Рамзи и Адријен Рабио. Од Јувентус не треба да се очекува на изглед убава игра, и покрај тоа што во тимот имаат фудбалери како Роналдо, Дибала или Пјаниќ. Но, единствено резултати.
Главна закана за Јуве, како и минатата сезона, ќе биде Наполи во чии редови сега ќе го гледаме и македонскиот репрезентативец Елиф Елмас. Наполитанците на Скудетото чекаат веќе речиси триесет години од времето на Диего Марадона.
Наполи од клупата е предводен од докажаниот и искусен Карло Анчелоти, кој тактиката на Сари од 4-3-3 ја преточи во 4-4-2, што се покажа како добро решение. „Сините“ без сомнение ќе бидат вистински конкурент на Јуве во трката за шампионската круна.
СЕРИЈА А (1. коло) (ДЕНЕСКА)
Парма – Јувентус (18 ч.)
Фиорентина – Наполи (20:45 ч.)
УТРЕ
Удинезе – Милан
Рома – Џенова
Каљари – Бреша
Сампдорија – Лацио
СПАЛ – Аталанта
Торино – Сасуоло
Верона – Болоња
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
