Најдобриот македонски атлетичар Дарио Ивановски го освои бронзениот медал на 63. Балканско првенство во крос кое се одржа во Беране, Црна Гора.
Ивановски во категоријата млади сениори на патеката од 8 километри, во голема конкуренција, заврши на третото место што е негов втор балкански медал оваа година по среброто на БП во Истанбул во сала.
„На ова Балканско првенство нашата цел беше освојување медал. Во тоа и успеавме а посебен шмек на овој медал му дава и фактот дека Дарио го освои со борба до последниот метар. Овој успех и пласман има посебно значење за нас бидејќи во балканската атлетска асоцијација членуваат моќни атлетски нации како Украина, Романија, Грција, Србија и секој ваков успех е потврда на класата која ја има Дарио. Нашата следна цел е Европското првенство во крос кое ќе се одржи во Лисабон, Португалија на 8. декември“ – вели тренерот на Ивановски, Игор Јакимовски.
Покрај Ивановски на Балканското првенство во Црна Гора настапија и Игор Јакимовски и Маја Рајчина во сениорска конкуренција, Кристијан Стојани и Рената Соколовска во категоријата млади сениори, Мартин Милошевски во јуниори, но завршувајќи со скромни резултати далеку од можноста за медал.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
