Арената „Тодор Проески“ кандидат за домаќин на првото финале од новата Конференциска лига на УЕФА!

Македонија и нашиот најголем стадион би можеле да бидат домаќини на уште еден европски фудбалски настан од највисоко ниво, по организацијата на УЕФА Суперкупот кој се одржа во 2017 година во Скопје.

Овој пат, Фудбалската федерација на Македонија подготвува кандидатура националната арена „Тодор Проески“ да биде домаќин на финалето од новата Конференциска лига на УЕФА која Европската куќа, како трето по квалитет европско клупско натпреварување го воведува од сезоната 2021/2022.

Според најавите ФФМ со арената „Тодор Проески“ е еден од најсериозните кандидати за организацијата на финалето или во првата сезона од Конференциската лига, 2021/22, или за следната – 2022/2023. Во игра за организацијата на првото финале од Конференциската лига се и стадионите „Ер Албанија“ во Тирана, како и стадионот на Сент Етјен во Франција.

Одлуката каде ќе се игра првото финале од ова ново натпреварување на УЕФА ќе биде донесена на 3. декември 2020 година.

Како што е познато, Македонија со воведувањето на новата Конференциска лига на УЕФА ќе остане без свои претставници во второто по квалитет натпреварување Лигата на Европа. Новата Конференциска лига ќе стартува од 2021 година и ќе има 32 екипи во групната фаза, а согласно промените 32 екипи во групната фаза ќе има и Лигата на Европа, која уште оваа и следната сезона ќе има по 48 клуба.

Токму овие промени носат и измени за Македонија и нејзините претставници во Европа. Со оглед на фактот дека Македонија, согласно клупскиот учинок во Европа, е на 39 место од 55 земји членки на УЕФА, и дефинитивно според измените во УЕФА од сезоната 2021/22 нема да има свои претставници во Лигата на Европа. За сите земји кои се под 15-то место на УЕФА ранг листата, а меѓу нив и Македонија која никако не може да го достигне тој ранг, ќе нема место во Лигата на Европа. Освојувачот на Купот на Македонија како и второ и третопласираната екипа во шампионатот ќе учествуваат во квалификациите (три квалификациски кола и плеј-оф) од Конференциската лига. А во Лигата на Европа нема да има место и за клубовите кои не се шампиони во своите држави ако земјите се под 15. место на УЕФА ранг листата.