Хрватскиот ракометар Стипе Мандалиниќ од Берлин се сели во Битола следната сезона. Го избрал Еурофарм Пелистер пред понудата на Мешков Брест. Одлучиле две работи, повисоката сума, но и тренерот Жељко Бабиќ кој го водеше во селекцијата на Хрватска.
„Имав понуда од Мешков Брест, а потоа се јави и Еурофарм Пелистер со уште подобра. Битола е поблиску до дома, а не е тајна дека големо влијание на одлуката имаше и тоа што тренер е Жељко Бабиќ. Би било одлично Еурофарм Пелистер да добие место во Лигата на шампионите, но и да не биде така, сепак, ќе играме во силната Лига на Европа. Ќе биде доста интересно и во СЕХА, но и во македонскиот шампионат. Таму е силниот Вардар, но и добриот Металург. Едвај чекам да ја почувствувам и атмосферата во Битола“, изјави Стипе Мандалиниќ за хрватскиот „Вечерњи Лист“.
Тој на почетокот на јуни ќе ја започне одисејата со Еурофарм Пелистер, а доаѓа од Фуксе Берлин, со искуство од Бундес-лигата.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
