Одамна не се случило нашите судии и претставници на Фудбалската федерација на Македонија да бидат толку ангажирани од страна на УЕФА како во текот на оваа недела што е добар знак на доверба од Европската куќа на фудбалот кон македонскиот фудбал.
Да почнеме со нашиот најдобар судија, интернационалецот Александар Ставрев кој ќе биде главен судија во Франција на мечот меѓу Лил и шкотскиот Селтик во рамките на Лига на Европа. Ќе му помагаат Дејан Костадинов и Дејан Неделковски, четврти судија е Димитар Мечкаровски. Средбата се игра на 29 октомври. Ова е вторпат како Ставрев му суди на Лил бидејќи му беше судија на средбата со Валенсија 2012 година во Купот на УЕФА.
Поранешниот меѓународен судија, сега претседател на Судискиот одбор на ФФМ Емил Божиновски отпатува за Шпанија каде вечерва во Мадрид ќе биде контролор на судењето на средбата во Лига на шампионите меѓу Атлетико Мадрид и Салцбург.
Не е заборавена и нашата најдобра судијка, интернационалката Ива Пројковска која ќе биде главен судија на натпреварот во Кишињев меѓу Молдавија и Полска во квалификациите за Европското првенство за жени. Ќе и помагаат Елена Соклевска-Илиевски и Вјолца Изеири, четврти судија е Ирена Велевачковска.
Александра Пејковска е одредена за делегат на мечот меѓу Романија и Швајцарија во квалификациите за Европското првенство за жени. Средбата се игра во спортскиот центар кај Букурешт. Двата меча се играат денес.
Листата ја завршуваме со генералниот секретар на ФФМ Филип Поповски кој ќе биде директор за организација на натпреварот на стадионот во Милано меѓу Милан и Спарта/Прага/ како и со Жарко Игњатоски кој е исто така одреден за организационен директор на УЕФА на мечот во Украина меѓу Зорија и Брага од Португалија кој се игра во Запорожје . И двете средби се од групната фаза на Лига на Европа.
М.М.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
