Милан го совлада Калјари на гостински терен со 0-2 во последниот натпревар од 18. коло и со нови три бода ја зацврсти лидерската позиција во Италија. По подолго време отсуство од зелените терени, конечно се врати Златан Ибрахимовиќ и тоа на најдобар можен начин, тој со два погодоци обезбеди рутинска победа на тимот од Милано.
По само шест минути од почетокот на натпреварот, играчот на Каљари, Харалампос Ликојанис направи непромислен прекршок и подари пенал за „росонерите“, а ова беше одлична шанса за гол и „кам-бек“ на повратникот во Милан, „Ибракадабра“. Контролата на играта ја имаше Милан, а притисокот беше кај домаќините. Гостите умешно знаеја да ја држат топката во свој посед и да направат шанса за уште еден гол со кој ќе си обезбедат сигурна победа. Играчите на Милан имаа сериозна шанса за 0-2, но немаа среќа. Во 37. минута Давид Калабрија испрати одличен удар кој заврши во десниот дирек, па по првите 45 минути, играчите на Милан заминаа на пауза со минимално водство од 0-1.
Вториот дел понуди репризен старт од првото полуреме, па Милан по седум минути игра дојде до водство од 0-2, а стрелец се разбира, беше неверојатниот Златан. Тој по еден центаршут, мајсторски ја прими топката и буквално ја „заби“ во противничката мрежа. Швеѓанецот имаше неверојатна вечер, неговото присуство на теренот значеше мотивација повеќе за неговите колеги, а во 66. минута Ибра повторно беше одлично проигран и се најде во уште една шанса за гол, но голманот на Каљари спречи водство од 0-3.
Кога се чинеше дека Милан лесно и без проблеми ќе го заврши натпреварот, Алексис Салемајкерс доби втор жолт картон и беше принуден да го напушти зелениот терен. Ова беше шанса за домаќините да нападнат и да дојдат до намалување на резултатот, а две вакви сериозни шанси имаа Алберто Цери во 82. минута и Лука Цепители во 85. минута, но без успешна реализација. Милан натпреварот го заврши со играч помалку и значајна победа за нови три бода и зацврстување на првата позиција во Серија А.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
