Џенаро Гатузо не може да крене глава од проблеми со коронавирусот откако двајца членови на Наполи беа позитивни на тестирањето пред утрешниот дуел со Џенова. Ако бекот Фаузи Гулам не е значаен дел од тимот на Гатузо, тоа дефинитивно не важи за Калиду Кулибали, Сенегалецот е клучен фудбалер во одбраната на „наполитанците“, а сега ќе мора да паузира најмалку две недели од терените.
Шпанецот Фабијан Руиз го победи коронавирусот и ќе биде во комбинација за настап во Џенова, но оваа вест падна во сенка на позитивниот тест на Кулибали.
„По тестирањето извршено утрово, Калиду Кулибали е позитивен на Covid-19. Фудбалерот е асимптоматичен, но ќе мора да мине период на самоизолација во својот дом“, објави Наполи на официјалната веб-страница.
Сенегалецот ќе го пропушти реваншот од полуфиналето во Купот на Италија против Аталанта, како и големото дерби на домашен терен со Јувентус закажано за наредниот викенд.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
