Легендарниот македонски борач Шабан Трстена веќе неколку дена се наоѓа во болница откако беше позитивен на коронавирус. Тој верува дека најтешкото од борбата веќе помина, а преку писмо објавено на официјалниот профил на фејсбук Трстена објави дека состојбата во изминатиот период му била критична, искажувајќи јавна благодарност до медицинските лица кои му го спасиле животот.
Воедно, Трстена апелираше до највисоките државни власти да ги наградат лекарите за пожртвуваноста и секојдневната борба да им се помогне на пациентите во болниците ширум Македонија.
Апелот на Шабан Трстена го пренесуваме во целост:
Драги мои, пријатели,добро утро Бог нека е со нас, браќа и сестри, спортисти, професори, уметници, писатели, новинари, студенти и сите мои сограѓани. Се што можам да ви кажам е следно: Имам една замолница, да апелирам до нашиот премиер Зоран Заев, министерот за здравство Венко Филипче, градоначалникот на Град Скопје, Петар Шилегов и до сите лидери на политичките партии. Јас сум спортист на 20-от век во нашата држава Македонија, а веќе поминувам 15 дена во борба против еден невидлив непријател наречен Ковид 19.
Се уште се лекувам во болница и искрено со свои очи ги гледам овие херои облечени во бело. Некои од тие доктори го загубија и својот живот, а сите други продолжуваат да си го ризикуваат животот за да го спасуваат животот на другите од проклетиот коронавирус. Вака овие три последни денови, јас, односно мојата душа, беше непосредно блиску со смртта, од непредвидливиот непријател Ковид-19. Почитувани добри луѓе, ви се колнам во името на БОГА, немојте да мислите дека јас како голем спортист и шампион го совладав овој голем непријател, не, никако, тоа не е точно. Јас не бев никој пред проклетиот вирус без сила и надеж.
Му благодарам само на БОГ, дека тоа било пишано што денес што сум жив и дека од денес се чувствувам многу подобро. Секако дека благодарноста од се срце им оди на моите лекари и нивниот персонал, хероите, кои ми помогнаа и се грижеа 24 часа секој ден и секоја ноќ. Ви благодарам од се срце и на сите пријатели од цел свет за убавите зборови и молитви и големиот БОГ што ги слушна вашите молитви за мојата болест. Амин. Чудно ми е, како тие имат големо срце, влегуват од соба во соба, одат од човек до човек, се жртвуваат себеси со заразната болест од коронавирусот, своите најблиски, само да не лекуваат нас. Овие херои заборавија дека имаат свои деца и заборават дека имаат одмор, дека треба да јадат и да спијат навреме.
Ако некој треба да биде прогласен за херој во оваа борба против непријателот коронавирусот, без сомнение тоа треба да биде целиот болнички персонал, почнувајќи од лекарите, медицинските сестри и целиот персонал кој е на фронтот против невидливиот непријател, што го нарушува животот во целата планета. Дури и на Балканскиот полуостров, во мојата татковина земја Македонија, и јас бев прилично тешко погоден од овој непријател, кој напаѓа без оглед на која вера и припаѓате или од која нација сме. Јас немам повеќе зборови за да ја опишам честа што ми ја прават овие херои, лекарите. Тие се грижат не само за мене, туку исто така и за секој пациент се грижат подеднакво.
Во мое име како олимписки шампион, како една личност, како спортист што сум патувал и го видел секој дел на светот, како спортист и достоен верник на Бога со раката на срце, со мојата гордост, спортски дух, им велам: Ви благодарам, бидете благословени и ви посакувам, ГОСПОД да Ве чува и да Ве награди за непрекината работа и жртвување што ја правите за нашиот народ во оваа земја, Македонија. Јас толку имав, ви ја кажав реалноста што ја видов, ја доживеав и ја почувствува мојата болна душа. Значи, почитуван премиер Заев, почитувани министри и вие, драги мои сограѓани, оваа моја официјална објава, не ја правам за некој функционер, некој друг или лично за мене. Јас како спортист со големи заслуги, ги добив сите светски големи награди и домашни признанија, ова го кажувам со искреност и од срце за нашите херои кои својата работа ја прават максимално посветено да ги спасат животите на нашите семејства, мајки, татковци, браќа, сестри и деца.
Да, тие и за мене го прават тоа, бидејќи во моментот се уште сум во болница.Сите није што сме во креветите во болниците, Господ да не заштити и зајакне, и оние што починаа засекогаш, нека Бог ги смилува и нивните души нека бидат во рајот. Ја користам можноста и моментот уште еднаш да апелирам до премиерот и целиот државен апарат, дека овие големи херои облечени во бело треба да им дадеме мотовација и бидат наградени, украсени со највисоки државни почести. Ова ќе се запишува и ќе ја кажува историјата низ вековите. Ова ќе биде меѓународна гордост на нашата мала земја, но од големо срце што знае да ги цени и наградува големите херои, во овој случај лекарите. Бог да го благослови нашиот народ. Со почит, срдечни поздрави од вашиот олимписки шампион, Ш.Т
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
