Мартин Томовски продолжува со одличните настапи во дресот на Лудвигсхафен откако македонскиот голман беше меѓу најзаслужните за победата на домашен терен над Бергишер од 28-22. Гостите имаа водство од 13-14 по првото полувреме, но Томовски блесна во вториот дел, прими само осум гола и му донесе пресврт и триумф на својот тим. Македонскиот голман го заврши мечот со 14 интервенции (два одбранети пенали), како потврда за одличната форма пред трансферот во Вардар што веќе е договорен за летово.
Вецлар лесно и убедливо го совлада Нордхорн со 35-26, натпревар што беше решен во првото полувреме што Филип Миркуловски и неговите тимски колеги го добија со 20-9. Македонскиот репрезентативец постигна три гола без промашување, а прв стрелец на Вецлар во убедливата победа беше Бјернсен со седум погодоци.
Филип Кузмановски и Хановер имаат причина да бидат разочарани откако не успеаја да го совладаат Фуксе Берлин, ремизирајќи 27-27 со незгодниот ривал. Хановер имаше водство од 27-24 во 57. минута, но гостите од Берлин успеаја да се вратат во финишот и да избегнат пораз. Кузмановски немаше свој ден, не се запиша меѓу стрелците и покрај двата обиди кон противничкиот гол, а зад неговото име останаа запишани две асистенции.
Жарко Пешевски и Штутгарт претрпеа пораз од 35-29 на гостувањето против Лемго. Македонскиот пивот постигна два гола од исто толку обиди за својот тим, недоволно за да се избегне пораз.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
