Сејдини: Во победа или пораз – ваква Македонија сакаме… не само фудбалска

Претседателот на Фудбалската Федерација на Македонија, Муамед Сејдини, преку обраќање до јавноста ја потенцираше гордоста од извонредниот успех со пласманот на ЕВРО 2020. Според Сејдини, начинот на функционирање на фудбалската репрезентација треба да биде пример за се останато во државата.

Успехот за историја е веќе остварен, сите сонуваат за испишување на нова историја во Букурешт и во Амстердам, а Сејдини им порачува на фудбалерите – да уживаат на терен, да дадат се од себе, па нека биде што биде.

Обраќањето на Муамед Сејдини го пренесувааме во целост…

“Некои приказни едноставно подобро се раскажуваат ако започнеме од крајот!

Победивме бидејќи си рековме себеси дека сме победници.

Македонската фудбалска репрезентација се пласираше на Европското првенство.

Бидете горди. Затоа што ова е време кога македонските фудбалски великани одат по земја”.

“Никогаш досега македонскиот фудбал не доживеал таква експлозија.

Тие емоции од Грузија со ништо дотогаш не можат да се споредат. Беа искрени и едноставно доаѓаа од целата наша држава како реакција на сѐ она што во годините наназад ни се случуваше во фудбалот.

Таа колективна екстаза и во време на здравствена епидемија доведе до тоа на скопските улици за прв пат да се скандираат имињата на македонските фудбалери”.

“Во ова наше општество на невозможни институции и Македонци и Албанци и Турци и Роми се обединети кога е во прашање фудбалската репрезентација.

Тоа треба да ни биде пример за начинот на кои сите треба да се однесувааме.

Во победа или пораз – таква Македонија сакаме. И не само фудбалска”.

“Никогаш не сме биле Европски прваци.

Но, никогаш во своите глави не сме биле поблизу до тоа чувство од овие денови пред Европското првенство.

И што и да се случи, ова чувство и оваа наша моќ никој не може да ни ја одземе.

Ниту оваа фудбалска Македонија. Самоуверена. Моќна. Храбра. Оптимистична”.

“Ова е победа за сите кои барем еднаш во животот го облекле дресот на Македонија. И сите имаат заслуга за овој историски момент. Од првиот до последниот”.

“Како Фудбалска федерација на Македонија сме сигурни дека фудбалерите и на натпреварите од Европското првенство ќе дадат се од себе за да го вивнат македонскиот фудбал во нови височини и одново да покажат дека припаѓаме меѓу најдобрите во Европа.

А, ние ќе бидеме заедно со нив и заедно со многубројните фанови и целокупната јавност и од срце ќе ги бодриме. Истовремено веруваме, се надеваме и посакуваме дека нашите фудбалери со својата игра и залагање ќе не исполнат со радост и гордост”.