По убедливиот пораз на првиот натпревар од турнирот на АБА2 лигата во Златибор, Пелистер денеска од 18 часот против Сутјеска ќе се обиде да го поправи впечатокот и да стигне до првата победа во регионалното натпреварување.
„Зелено-белите“ потфрлија против Ловќен, натпревар во кој дозволија противникот да ја надмине границата од сто постигнати поени, притоа имаа и 19 изгубени топки што е премногу за едно вакво натпреварување. Но, лошиот меч е надминат, а погледите во таборот на битолчани се свртени кон денешниот противник.
„По првиот натпревар против Ловќен видовме дека не можеме да влеземе во ниту еден натпревар без сериозен пристап и дека во оваа лига нема лесен противник. За натпреварот против Сутјеска очекувам да одиграме посериозно уште од самиот почеток на натпреварот со подобра одбрана и се надевам дека ќе победиме“, изјави за ЕКИПА, Марјан Младеновиќ.
Црногорскиот противник е тим кој добро ја користи висината во рекетот, а тоа го докажаа и на мечот против Рогашка на кој постигнаа 34 поени во овој сегмент од играта па „зелено-белите“ ќе мораат денеска да го лимитираат противникот во рекетот доколку сакаат да стигнат до првите два бода.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
