Мартин Томовски имаше уште еден одличен меч на голот на Вардар, откако македонскиот репрезентативец со десет успешни интервенции даде значаен придонес во победата над Еурофарм Пелистер 2 и пласманот во финалето од Купот на Македонија.
Вардар ја имаше улогата на голем фаворит, потешко од очекувањата стигна до победата, но според Томовски најважно од се е што е забележан триумф за пласман во големото финале.
„Дефинитивно дека фаворитската улога тежи, но ние одговоривме на предизвикот и успеавме да славиме. Среќни сме, посакувавме финале и го остваривме тоа. Го чекаме ривалот во финалето, дали тоа ќе биде Еурофарм Пелистер или Бутел, но нашата желба е јасна – да се закитиме со трофејот во Купот на Македонија. Остануваме фокусирани и на ова натпреварување како и на плејофот, каде ни преостануваат уште две кола во трката за титулата. Честитки до ракометарите на Еурофарм Пелистер 2 за фер и коректниот натпревар“, истакна Томовски.
Во вториот полуфинален меч во Кавадарци во 20 часот ќе се сретнат екипите на Еурофарм Пелистер и Бутел.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
