Централниот дефанзивец Никола Серафимов уште еднаш без грешка го одигра својот втор натпревар во дресот на македонската репрезентација. По своето деби на гостувањето во Гибралтар, сега Серафимов и целокупната дефанзива со уште еден натпревар без примен погодок.
Серафимов не го крие задоволството од високата победа од 4-0 против Гибралтарците, нагласувајќи дека останува горчината од претходниот пораз од Грузија, но знае дека оваа селекција на Македонија се додека постои и најмала шанса ќе се бори за првото место во групата кое би не однело до Лига Б во следната сезона од Лигата на нации.
„Одогравме еден навистина добар натпревар кој беше завршен уште во првото полувреме. Тоа беше целта и замислата за да се сочуваат силите на дел од фудбалерите, зашто некои одиграа и по три меча во континуитет. Па, во второто полувреме шанса добија и останатите и им честитам на тие што дебитираа во македонскиот дрес“ – вели Серафимов и дополнува:
„Добро е што остануваме во игра за првото место. Навистина на сите ни е многу мака што дозволивме да изгубиме еден таков меч на Арената со Грузија, но што е тоа е, одиме понатаму. Не можеме да го преболиме тој пораз од Грузија, но искрено верувам дека уште можеме да стигнеме до посакуваното прво место во групата. Селекторот потенцира дека е најважно да останеме како тим, тоа го покажавме денеска и знам дека ќе растеме од циклус во циклус“.
Македонија на 22. септември ја очекува одлучувачкиот натпревар во групата, гостувањето против Грузија во Тбилиси, а потоа на 26. септември во последното коло ја пречекува Бугарија на домашен терен.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
