Со последниот договорен трансфер на младинскиот репрезентативец Јован Манев во турскиот суперлигаш Адана Демирспор, ФК Брегалница јасно уште еднаш ја потврдува определбата, покрај секогаш високите резултатски амбиции, да се овозможи и успешен фудбалски пат за младите и талентирани фудбалери кои во клубот имаа сериозен свој партнер.
„Горди и задоволни сме што како клуб овозможуваме вистински фудбалски пат на највисоко ниво за нашите млади докажани фудбалери. Тоа беше една од нашите цели уште од самото преземање на клубот, и затоа за нас е секако нескриено и задоволството што за вака исклучително краток период Брегалница веќе почна да реализира продажба на млади играчи. Клубот на тој начин веќе препознатливо се издвојува и на европската фудбалска карта како средина во која се продуцира вистински фудбалски квалитет“ – вели сопственикот на Брегалница, Кирил Гогов, притоа не криејќи го задоволството и од успешно завршените преговори меѓу ФК Брегалница и ФК Адана за трансферот на Јован Манев.
„Среќни сме што Јован Манев израсна како врвен фудбалер во нашата средина, и среќни сме што ете сега можеме да му сервисираме и интернационален пат каков што заслужува и од кој исклучително позитивен ефект ќе има и македонскиот фудбал“ – дополнува Гогов.
А, потврда на повеќе од успешно зацртаната политика на клубот секако е и претходниот трансфер на Мартин Стојанов во бугарскиот прволигаш Септември Софија. Оваа година, како што е познато, Брегалница го продаде и 23-годишниот Михаил Маневски на Шкендија, а нескриен интерес од екипи од странство има уште за неколку млади фудбалери на „сините“.
Брегалница и во иднина ќе продолжи со силна поддршка на младите и талентирани фудбалери од регионот и од Македонија кои треба да бидат темел на екипата, а притоа овозможувајќи им и средина од каде ќе се лансираат кон врвниот европски фудбал.
„Трансферот на Јован Манев е силна потврда на сите наши заложби за максимална поддршка на младите и талентирани фудбалери, кои како што истакнавме и со преземањето на клубот, ќе бидат секогаш максимално промовирани во интерес и на нивните кариери, на клубот и на македонскиот фудбал воопшто. Горди сме што се реализира еден ваков трансфер, и среќни што Јован Манев зачекорува низ кариера каква што секако заслужува“ – вели спортскиот директор на Брегалница, Никола Тонев, по дефинитивната официјализација на договорот меѓу штипскиот клуб и турскиот суперлигаш Адана Демирспор.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
