Роберт Левандовски не го крие задоволството од почетоците на својата авантура во Барселона, откако полскиот ас по долго инсистирање конечно успеа да го напушти Баерн Минхен и да се пресели во редовите на каталонскиот гигант.
Тој одби богати понуди од Челси и од ПСЖ за да си ја исполни желбата и да го облече дресот на Барса, a дебито за новиот клуб го имаше во победата на вечното дерби со Реал Мадрид (1-0), меч одигран во Лас Вегас.
„Иако е ова само пријателски меч, дерби дуелите секогаш се специјални и јас уживав играјќи на овој дуел. Задоволен сум и од квалитетот и од интензитетот на играта што го покажавме. Веќе се насочивме кон следниот тренинг, кон следниот натпревар, бидејќи чувствуваме дека сме дел од нешто прекрасно и знаеме дека најдоброто од Барса допрва следи. Јас само неколку дена сум овде, но се чувствувам како со месеци да сум дел од Барселона. Имам огромна поддршка од соиграчите и од стручниот штаб, сите сме со една единствена желба – да победуваме“, изјави Левандовски.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
