Јуниорската репрезентација на Македонија ја забележа првата победа на Европското Првенство што се одржува во Измир, славејќи со резултат 65-62 над селекцијата на Црна Гора. „Црвено-жолтите“ јуниори конечно се израдуваа на триумф на шампионатот, но ова не значи и сигурен опстанок во А-дивизијата, бидејќи за тоа да се случи неопходно ќе биде да се слави и на утрешниот дуел со Хрватска, во спротивно М18 селекцијата во следната година ќе се пресели во понизок ранг на натпреварување.
Денешниот меч донесе израмнета борба во која и двете селекции имаа свои периоди на подобра игра. Македонија беше поквалитетна во првото полувреме и на одмор замина со водство од 32-25. Црногорците одиграа одлична трета четвртина што ја добија со 24-14 и го свртеа резултатот во своја корист, но македонските јуниори не застанаа, продолжија со борбата и со подобра игра во самата заавршница стигнаа до победата.
Клучни се покажаа поените на Шошкиќ на една минута до крајот, кога при резултат 61-62 младиот кошаркар на Работнички погоди „два плус еден“, вртејќи го резултатот во наша полза, а конечните 65-62 со едно реализирано слободно фрлање да ги постави Башоски.
Шошкиќ со 16 поени беше најефикасен во македонскиот табор, Симиќ оствари дабл-дабл од 13 поени и 14 скока, а 13 поени реализираше и Бошалески.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
