Европа на големо се подготвува за еден од најинтересните Евробаскети во историјата. Настапот на НБА ѕвездите како Никола Јокиќ, Лука Дончиќ и Јанис Адетокумпо привлекоа голем интерес за континенталниот собир кој започнува денеска со натпреварот помеѓу Шпанија и Бугарија.
Бранител на трофејот на 41-то издание на собирот на најдобрите европски репрезентации е Словенија, како најголем фаворит за освојување на златниот медал експертите ја гледаат Србија, додека Франција, Грција, Литванија и Турција од сенка ќе се обидат да бидат најпријатното изненадување на турнирот.
Интересно, не секогаш европските репрезентации стигале до златниот медал на едно првенство, а така беше во 1949 година кога на златниот медал се радуваа Еѓипјаните на домашен терен. На првенството на кој настапија само седум репрезетнации меѓу учесниците беа и Сирија и Либан. Сребрениот медал и припадна на Франција, а бронзениот на Грција.
Советскиот сојуз од 50-тите до 70-тите години на претходниот век доминираше на сцената со десет злани медали освоени на единаесет осовени првенства, а репрезентацијата од 1953 година го држи рекордот на најубедлив триумф славејќи против Данска со 118-14.
Најмногу постигнати поени на Европските првенства има Пау Гасол. Легендарниот Шпанец стигна до бројката од 1183 поени, а тој и легенарниот југословенски кошаркар Крешимир Чошиќ се единствените играчи со две МВП признанија во историјата на првенството. Meѓу легендите кои имаат свое место во историјата е и Гркот Никос Галис кој со просек од 31.2 поени по натпревар ја предводи листата на најуспешни реализтори.
Една од најголемите доминации на Евробаскетот изрази и Југославија која во 2001 година до финалето секој натпревар го доби со повеќе од десет поени разлика, а за златниот медал ја совлада Турција со девет поени.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
