Претседателот на Светската фудбалска федерација (ФИФА), Џани Инфантино на нешто повеќе од еден месец до почетокот на Светското првенство вели дека тоа ќе биде најдоброто во историјата.
Мундијалот ќе стартува на 20. ноември и ќе трае до 18 декември, и е прво Светско првенство во историјата кое место во лето, ќе се игра во доцната есен.
„Јас секогаш кажував и верувам во тоа, а сега ќе повторам, СП во Катар ќе биде најдобриот Мундијал на сите времиња. Само погледнете какви се стадионите, тренинг-центрите, метрото, комплетната надворешна инфраструктура. Сè е подготвено и сите се добредојдени на фестивалот. Да бидам јасен, сите се добредојдени без оглед на потеклото, религиозната припадност, сексуалната ориентација, националноста, полот… И ова СП нема да испорача само фудбал на врвна инфраструктура, туку ќе остави наследство за кое ќе се прераскажува и ќе создаде сеќавања за цел живот“, рече Инфантино.
Катар официјално не објави колку севкупно чини организацијата на СП, но светските медиуми дури објавија суми од 200 милијарди евра.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
