Светската фудбалска федерација (ФИФА) упати предупредување до фудбалската селекција на Тунис како последна опомена пред исклучување, поради мешање на политиката во спортот.
Во ек кога Украина и Италија сонуваат невозможно сценарио, ФИФА да го исклучи Иран за некоја од двете селекции да се протне на најголемиот турнир, сега светската центрача упати последна опомена кон министерството за спорт на оваа африканска земја поради коментари на министерот за можно „распуштање на сите федерални институции“.
Туниска федерација се пожали во Цирих, па експресно од ФИФА дојде објаснување дека политиката мора да остане надвор од спортот и фудбалот, а ако не се запре следува исклучување, нешто што ФИФА многу често го користи како средство за да ја заштити фудбалската федерација во една земја.
Кенија и Зимбабве годиава добија суспензии поради мешање на политиката во фудбалот, додека Индија доби суспензија, па ѝ беше укината поради „мешање на трети страни“.
„Не е една изјава, туку тоа се многу во низа. Министерот веќе бараше да се пролионгира стартот на првенството, па се закануваше дека ќе ја распушти федерацијата… ФТФ сето тоа го гледа како закана, а ФИФА такви работи не дозволува“, рекоа од федерацијата.
Ако Тунис добие црвен картон, што е малку веројатно, но не и невозможно, замена ќе биде Мали, селекција која е најдобро рангирана, а не е учесник на СП од африканскиот континент и селекција која испадна од Тунис во баражите за Мундијалот.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
