Младинскиот состав на МЗТ Скопје овој викенд ќе настапи на АБА турнирот за играчи до 19 години каде силите ќе си ги одмери со српската Црвена Звезда и црногорскиот Студентски Центар. За аеродромци ова воедно претставува и враќање во првенството во кое последен пат настапија во сезоната 2019/20 и беа на чекор до пласман во завршницата со скор од три победи и два порази.
Тренерот Бојан Серафимов верува дека нема да биде лесно, но и дека „сино-белите“ ќе се претстават во својот претпознатлив стил на игра.
„Благодарен сум на управата на МЗТ Скопје на оваа шанса да ја предводам екипата на овој младински АБА турнир. Ова ќе биде големо искуство и за тимот и за мене бидејќи излегуваме на балканска сцена, каде се наоѓаат екипи кои се на самиот балкански врв – Партизан, Црвена звезда, Цедевита Олимпија, Мега, Будуќност итн. Оваа група на играчи е заедно веќе две години, ова е екипа која лани беше втора во Македонија во М18 натпреварувањето – успеавме да го задржиме костурот на екипата и додадовме двајца играчи кои секако беа наши членови – Бојан Стојановски и Виктор Стојковски кој беше една година во Шпанија. Ова за нив ќе биде едно големо искуство, да видат како се работи на Балканот, да почувствуваат малку поагресивна игра. Нема да биде лесно, но очекувам да се прикажеме во едно одлично издание каде ќе прикажеме агресивна игра и во нападот и во одбраната, добра транзиција, и на крајот ова е спорт – секој секого може да добие, едно е да си фаворит на хартија но друго е на терен. Се надевам дека моите момци ќе дадат се’ од себе и дека ќе извојуваме барем една победа“, вели младиот стратег.
Дресот на МЗТ Скопје ќе го носат: Филип Дочински, Бојан Величковски, Виктор Стојковски, Борјан Ангелковски, Алек Димоски, Бер Абди, Давид Талевски, Лука Серафимоски, Давор Миливојевиќ, Александар Ристовски, Бојан Стојановски и Андреј Гичев, а на тренерот Серафимов помошник ќе му биде Стефан Кукуноски.
Првиот натпревар за МЗТ Скопје ќе биде против Студентски Центар во сабота (12.11) од 19 часост, а ден подоцна ги очекува и средба против Црвена Звезда со почеток од 12 часот и 30 минути.
View this post on Instagram
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
