Нејмар нема среќа со настапите на светските шампионати, откако најдобриот бразилски фудбалер повторно се повреди на еден мундијалски меч. Повредата на скочниот зглоб на дуелот со Србија значи дека тој ќе ги пропушти најмалку преостанатите две средби од групната фаза, а можеби и осминафиналето од СП, но асот на ПСЖ делува мотивирано да блесна кога конечно ќе се врати на терените.
Тој денеска преку објава на својот инстаграм профил испрати порака до сите ривали кои грубо стартуваат врз него на натпреварите, но и до бразилските фанови, говорејќи за гордоста додека го носи националниот дрес.
„Денеска ми е еден од најтешките моменти во кариерата, и тоа повторно на едно Светско првенство. Да, се повредив, ме нервира, ме боли, но сигурен сум дека ќе имам можност да се вратам. А тогаш ќе дадам се од себе за да и помогнам на својата земја. Гордоста и љубовта што ја чувствувам додека го носам дресот на Бразил се необјасниви со зборови. Противниците сакаат да ме скршат? Никогаш нема да успеат. Јас сум син на семоќниот Бог и мојата вера е бескрајна“, порача Нејмар.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
