Еден од најдобрите фудбалери на сите времиња Лионел Меси има една голема желба со трофејот од Светските првенства да ги заврши своите настапи на Мундијалите. Аргентинецот идниот Мундијал ќе има веќе 39 години, и тешко дека ќе биде способен тогаш да и помогне на својата селекција да дојде до трофејот.
Затоа ова е последната шанса на еден од најголемите на сите времиња, а Аргентина патот кон финалето и натпреварот за пехарот го почнува против Холандија. На Лусаил стадионот Холанѓаните ќе застанат на патот на „Гаучосите“. И избраниците на Луј Ван Гал си имаат свои желби и амбиции да дојдат до драгоцениот трофеј. За потсетување дека откако е вратен Луј ван Гал на клупата, Холандија нема пораз, а исто така селекторот не знае за пораз во регуларен дел на Светските пренства.
„Аргентина е фантастичен тим, и мораме да бидеме сконцентрирани. Мораме добро да се подготвиме за нивната игра. Имаат одлични играчи кои може во секој момент да придонесат за опасност пред нашиот гол. Мораме да бидеме добри во сите делови од теренот“, рече Вирџил Ван Дајк, капитенот на Холандија.
За Аргентина пораз би значел уште еден крај на сонот за освојување на СП. Лошо го почнаа „Гаучосите“ овој Мундијал, но потоа победите над Мексико и Полска му овозможија на тимот да се пласира во 1/8 финалето, па преку Австралија среќно да дојде до 1/4 финалето (Австралија имаше шанса за 2-2 во судиското надополнувње).
„Ќе биде убав меч за гледање, затоа што играат две екипи кои преферираат офанзивен фудбал. Но исто така мислат и на одбраната. Ако мислите само да напаѓате, сигурно дека ќе ја платите цената. Затоа треба да бидеме многу внимателни“, рече Лионел Скалони, селекторот на Аргентина.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
