Лазаров е оптимист: Имаме свој идентитет, од срце верувам дека Македонија ќе стане Норвешка

Селекторот Кире Лазаров е оптимистички расположен за долгорочната иднина на македонската репрезентација пред тргнувањето на пат за СП во Краков, каде нашиот национален тим в петок ќе го почнува настапот на ракометниот мундијал.

Тој им честиташе на своите избраници за добрите игри и резултати во минатата година, потенцирајќи го самиот пласман на СП 2023 за важна работа за македонскиот ракомет.

„На почеток сме на едно големо натпреварување, СП во Полска и во Шведска. Зад нас се четири контролни натпревари со квалитетни ривали на кои имавме можност да ја темпираме формата и да се подготвиме за она што не очекува. Сакам да нагласам една работа, многу труд ентузијазам и борба вложивме за да дојдеме до ова СП, бидејќи во меѓувреме направивме смена на генерација и со обединети сили стигнавме до мундијалот. На момците треба да им се даде поддршка, ова беше напорна година за нив, бидејќи минавме два баражи против Романија и Чешка, се пласиравме на СП и дадовме шанса за оваа генерација да продолжи по стапките на нас повозрасните. За сето она што  ссработено им се заблагодарувам на момците, кои заслужуваат пофалба за резултатите лани, но и да се даде охрабрување за предизвиците што се пред нив во Полска“, истакна Лазаров.

Македонскиот селектор уште еднаш потенцираше дека клучна работа е создавањето на препознатлив стил на игра, многу побрз од било кога претходно кога станува збор за нашиот националн тим.

„Она што е најважно, ние имаме свој идентитет во играта, што е тешко бидејќи низ годините секогаш игравме многу бавно и тоа беше еден наш заштитен знак. Не знам дали тоа ќе биде доволно да се победува или да се губи, но убеден сум дека сме на вистински пат. Во првото коло играме против Норвешка, јас од срце верувам дека за неколку години и ние ќе станеме Норвешка, селекција што игра скандинавски ракомет, со брз и препознатлив стил на игра“, изјави Кире Лазаров.