МЗТ Скопје денеска во 18 часот гостува во Црна Гора на тимот на Морнар, меч на кој „металците“ се надеваат дека конечно ќе ја забележат првата гостинска победа во АБА-лигата. Триумфот над Цедевита Олимпија минатото коло ја врати надежта за опстанок во елитното друштво во регионот, но на сите во таборот на македонскиот првак им е јасно, за опстанок во АБА1 неопходно ќе биде да почне да се победува и надвор од својата сала.
МЗТ е единствениот тим без гостинска победа во АБА1, а мотив повеќе за избраниците на тренерот Николиќ треба да биде фактот дека во првиот меч сезонава загубија од Морнар со резултат 77-94. Севкупниот скор е поразителен, екипата на МЗТ во историјата одиграла пет средби со тимот од Бар и претрпела сито толку порази, уште една црна серија што аеродромци ќе се обидат вечерва да ја прекинат.
„Во Бар одиме со оптимизам и зголемена саодоверба, но без еуфорија бидејќи не ги забораваме претходните лоши партии, особено на гостински терен. МЗТ е единствен без победа на теренот на некој од противниците и ако сакаме опстанок во АБа ова мора драстично да се промени, секако во наша корист. Очекувам подобра игра на моите кошаркари, кои се надевам дека ќе го задржат квалитетот и нивото на енергија од средбата против Цедевита. Ако го сторат тоа, ќе имаме шанси да се радуваме по пресметката крај Јадранското Море“, изјави Николиќ.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
