Струга ТЛ одново се „лизна“ на патот кон титулата, и освои само бод, односно загуби два во дуелот со Македонија ЃП, а сето тоа го искористи Шкупи кој опасно се доближи до првото место на табелата. Шкупи, пак, го совлада Работнички по враќањето на „Чаир“ иако од клупата не ги водеше Гоце Седлоски поради жолти картони. Брегалница убедливо го совлада составот на Победа, додека Шкендија на крајот му го нанесе првиот пораз на Академија Пандев во оваа 2023 година.
Во скопската пресметка на Чаир, Шкупи со мали проблеми на стартот од мечот, го совлада составот на Работнички. Чаирчани поведоа, и кога се чини дека лесно ќе дојдат до триумфот, „романтичарите“ веднаш се вратија. Но, тоа само ги налути шампионите, кои до полувремето го решија победникот.
Стоперот Бајрами донесе домашна радост, за Мазари недолго потоа да успеа да израмни. Меѓутоа до финишот на првиот дел уште два гола во мрежата на Алексовски преку Куевен и Цефас за убаво водство уште на полувремето.
Брегалница лесно ги освои трите бода против Победа. Штипјани славеа убедлив триумф против тимот кој веројатно ќе заврши на последното место, после проблемите кои ги имаше во зимскиот преоден рок. Стрелци за штипјани беа Додев и Мојсов во првиот дел, а во вториот два пати погоди Николов.
Шкендија го совлада тимот на Академија Пандев со 2-1. Херој на тетовци е Чинари кој ги даде двата гола за „црвено-црните“ уште во првиот дел од средбата. Во второто полувреме после една супер акција намали Емгерлидзе.
Македонија ЃП одново „издржа“ во Струга, но овојпат немаше два пенали. Херој повторно е голманот Стевковски кој одбрани неколку тешки удари и така одново го одбрани својот тим од налетите на лидерот и му „скина“ два бода. Ова е голем бод за „лавовите“ кои првпат играа со Тони Џангаровски на клупата, по разделбата со Муарем Бајрами.
Вчера Силекс го совлада составот на Скопје со 3-1.
ПМФЛ, 23. КОЛО
ШКУПИ – РАБОТНИЧКИ 3-1
(Бајрами 11′, Куевен 33′, Цефас 38′ – Мазари 14′)
БРЕГАЛНИЦА – ПОБЕДА 4-0
(Додев 3′, Мојсов 11′, Николов 61′, 67′)
СТРУГА ТЛ – МАКЕДОНИЈА ЃП 0-0
ШКЕНДИЈА – АК. ПАНДЕВ 2-1
(Чинари 31′, 45′ – Емгерлидзе 65′)
ВЧЕРА:
СИЛЕКС – СКОПЈЕ 3-1
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
