По „скалпот“ на Шкупи во претходното коло, екипата на Скопје „украде“ бод и во пресметката против лидерот Струга ТЛ во 26. коло од Првата македонска фудбалска лига. Со гол во 87. минута тимот на Мирсад Јонуз дојде до 1-1 против лидерот во шампионатот. Сето тоа го искористи Шкупи кој со убедлива победа од 0-6 против прилепска Победа повторно се врати на втората позиција на табелата.
Стружани релативно рано дојдоа до предност против Скопје, со голот на Ибраими во 15. минута од средбата.
Ибраими одлично прими топка на десеттина метри пред голот на домашните и мајсторски со волеј од свртување погоди за 0-1…
Но, во 87. минута по одличната акција на Чурлинов по десната страна и нафрлањето на вториот дирек, Камерунецот Пјер-Анри Мусинга со глава постигна убав гол за 1-1.
Во Прилеп, пак, Шкупи дојде до предност од 0-1 со голот Сандеј Адетунџи во 35. минута од средбата. Сите останати пет гола беа во второто полувреме за конечни 0-6. Уште еден гол во вториот дел постигна Адетунџи, двапати стрелаше и Реналдо Цефас, а по еднаш погодија Алварез и Данфа.
Брегалница, пак, победи со 2-1 во пресметката против Македонија ЃП на дуелот во Штип.
Штипските „сините“ до предноста дојдоа благодарение на одличната брза акција на Дарко Додев и Ѓорѓи Ѓорѓиев. Додев одлично продре по десната страна, нафрли пред голот на гостите каде од шест метри одлично се снајде Ѓорѓиев кој мајсторски смести под гредата од голот на Стевковски.
Уште една одлична акција на штипјани потоа во 64. минута која со ефектен погодок под самата греда од гостинскиот гол ја заокружи младинскиот репрезентативец Иван Николов…
На крајот, Македонија ЃП со гол во 93. минута преку Вукачин Јовковиќ успеа само да го ублажи поразот за конечни 2-1.
На дуелите во Струмица и во Кавадарци немаше погодоци.
ПМФЛ – 26. КОЛО
Скопје: СКОПЈЕ – СТРУГА ТЛ 1-1
Мусинга 87′ – Ибраими 15′
Штип: БРЕГАЛНИЦА – МАКЕДОНИЈА ЃП 2-1
Ѓорѓиев 51′, Николов 64′ – Јовковиќ 90’+3
Струмица: АК. ПАНДЕВ – РАБОТНИЧКИ 0-0
Кавадарци: ТИКВЕШ – СИЛЕКС 0-0
Прилеп: ПОБЕДА – ШКУПИ 0-6
Сандеј Адетунџи 35′, 55′, Цефас 50′, 59′, Алварез 70′, Данфа 79′
ШКЕНДИЈА – слободна
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
