Евертон е големиот добитник во последното премиерлигашко коло откако „карамелите“ го победија Борнмут со 1-0, за три бода кои значеа опстанок во елитното англиско фудбалско друштво. Дукуре беше стрелец на единствениот гол со извонреден волеј од дваесетина метри со што го скрши отпорот на противниците, за тотална еуфорија на „Гудисон парк“. Триумфот на Евертон значеше дека во Чемпионшип-дивизијата се сели тимот на Лестер. „Лисиците“ попладнево славеа со 2-1 над Вест Хем, но сепак ја завршија сезоната со два бода заостанување зад Евертон, па како 18. на табелата се селат во понизок ранг на натпреварување.
Својот настап во Премиер-лигата неславно го заврши и Лидс, откако избраниците на Сем Алардајс загубија во последното коло на домашен терен од Тотенхем со 1-4. Последниот гол за „спарси“ беше дело на Лукас Моура, кој летово како слободен играч ќе го напушти лондонскиот клуб.
Астон Вила во следната сезона ќе игра во европските натпреварувања откако избраниците на Унаи Емери славеа со 2-1 над Брајтон, за три бода со кои го осигураа учеството во Конференциската лига на УЕФА.
Шампионот Манчестер Сити загуби со 1-0 од Брентфорд, меч на кој Пеп Гвардиола повторно одмори голем дел од првотимците, додека Арсенал го демолираше Вулверхемптон со 5-0. Првите два гола ги постигна Гранит Џака, швајцарскиот ас што го играше својот последен меч за „топчиите“ пред летниот трансфер во Баер Леверкузен.
Лудо и интересно беше на дуелот меѓу веќе испаднатиот Саутемптон и тимот на Ливерпул, кој без оглед на резултатот ја завршуваше сезоната како петтопласиран на табелата. „Црвените“ поведоа со 0-2 за десетина минути игра, Саутемптон со неверојатен пресврт поведе со 4-2, но Ливерпул се врати и со головите на Гакпо и на Жота стигна до конечните 4-4.
Само за потсетување, промоција од Чемпионшип во Премиер-лигата обезбедија Барнли, Шефилд Јунајтед и Лутон.
Резултати Англија:
Арсенал – Вулверхемптон 5-0, Саутемптон – Ливерпул 4-4, Кристал Палас – Нотингем 1-1, Лидс – Тотенхем 1-4, Манчестер Ј. – Фулам 2-1, Астон Вила – Брајтон 2-1, Брентфорд – Ман. Сити 1-0, Евертон – Борнмут 1-0, Лестер – Вест Хем 2-1, Челси – Њукасл 1-1.
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
