Изминатиов период се актуализира темата за зголемување на дозволениот број странски кошаркари во македонските екипи. Сосема е јасно дека една таква одлука е единствено на штета на македонската кошарка, но и на домашните кошаркари а преку тоа и на националните селекции.
Токму поради тоа Здружението на македонски кошаркари се огласи со соопштение, кое е еден вид повик до Кошаркарската федерација и стручните лица во неа да не дозволат да се застане на развојот на младите македонски кошаркари.
Од здружението се надеваат дека „нема да бидат ставени во позиција да ја користат македонската кошаркарска репрезентација како алатка да се заштити македонската кошарка, а тоа ќе биде единствената преостаната опција доколку не се наиде на поддршка од оние кои ја имаат одлучувачката улога“.
СООПШТЕНИЕТО ОД ЗДРУЖЕНИЕТО НА МАКЕДОНСКИ КОШАРКАРИ ВИ ГО ПРЕНЕСУВАМЕ ВО ЦЕЛОСТ:
Следствено збиднувањата поврзани со барањето на некои од кошаркарските клубови за зголемување на бројот на странски играчи, го покреваме овој апел до сите спортски работници и пред сѐ – Кошаркарската Федерација.
Изминатите години, откако беше намален бројот на странски играчи во нашата лига, бевме и сѐ уште сме сведоци на константниот напредок на нашата репрезентација. Во прилог на истата таа одлука, произлегоа неколку нови, млади и квалитетни македонски кошаркари, кои дури и прераснаа во лидери на своите екипи.
Фактот дека давањето шанса на младите играчи подложи на одредени ризици е занемарлив, меѓутоа, тоа е единствениот начин за напредок на македонската кошарка. Секој напредок, независно за што станува збор, изискува одреден ризик.
Здружението на играчи верува во стручноста на луѓето кои во моментов раководат со нашата Кошаркарска Федерација и нејзиниот Управен одбор, па очекуваме дека сериозноста на ова барање ќе биде сфатена, како и големите последици кои би ги предизвикала нивната потенцијална афирмација на истото тоа барање.
Ние, македонските кошаркари, искрено се надеваме дека нема да бидеме ставени во позиција да ја користиме македонската кошаркарска репрезентација како алатка да се заштитиме, а тоа ќе ни биде единствената преостаната опција доколку не наидеме на поддршка од оние кои ја имаат одлучувачката улога.
Уште еднаш потенцираме дека оваа одлука е една од клучните за развој на македонските играчи во иднина и е тема која е најболна за целата македонска кошарка.
Иднината на македонската кошарка останува во рацете на Федерацијата.
Со почит,
Здружение на кошаркари на Македонија
Крадењето авторски текстови е казниво со закон. Преземањето на авторски содржини (текстови и фотографии), како и нивно линкување НЕ е дозволено без согласност од Редакцијата на ЕКИПА
